Frontend Development (تطوير الواجهات)

فرونت اند هو فن تحويل التصميم الجامد (Design) إلى كود حي يشتغل بالمتصفح. مطور الواجهات هو "حلقة الوصل" بين المصمم (UI/UX) وبين السيرفر (Backend). شغلتك تاخذ التصميم وتسويه موقع حقيقي، سريع، متجاوب (Responsive)، ويشتغل صح على كل الأجهزة من الموبايل للحاسبة.

اللغات الثلاثة الأساسية

ما تكدر تصير مطور واجهات إذا ما تضبط هذني الثلاثة بالترتيب، هن حجر الأساس لكل شي راح تتعلمه بعدين:

1. HTML (HyperText Markup Language)

الوظيفة: الهيكل والمحتوى. تخيلها هي "العظم" مال الإنسان. هي اللي تكول للمتصفح: "هنا اكو عنوان"، "هنا اكو صورة"، "هنا اكو حقل إدخال". بدون HTML، الصفحة بيضاء فارغة.

2. CSS (Cascading Style Sheets)

الوظيفة: الشكل والمظهر. هاي "الملابس والجلد". هي المسؤولة عن الجمالية: الألوان، نوع الخط، المسافات، وترتيب العناصر بالشاشة. وبدونها الموقع يطلع عبارة عن نصوص مخربطة (مثل مواقع الي بالتسعينات شوف هاي الموقع كمثال). أهم مهارة هنا هي الـ Responsive Design (شلون تخلي الموقع حلو ع الموبايل والحاسبة بنفس الوقت).

3. JavaScript (JS)

الوظيفة: التفاعل والمنطق. هاي "العقل والعضلات". هي لغة البرمجة الفعلية اللي تخلي الموقع "ذكي". هي اللي تخليك تضغط دكمة وتطلعلك نافذة، أو ترسل بيانات للسيرفر وتجيب الجواب بدون ما ترست الصفحة.

قاعدة ذهبية: لا تفر للمكتبات (Libraries) قبل ما تضبط الأساسيات الفوك.

عصر المكاتب وإطارات العمل (Frameworks)

بالمشاريع الكبيرة، كتابة كود JavaScript صافي (Vanilla JS) يصير متعب وياخذ وقت طويل وصعب إدارته. هنا يجي دور الـ Frameworks. بـ 2026، السوق العراقي والعالمي يركز بشكل كبير على:

• React.js: مكتبة من فيسبوك لبناء واجهات المستخدم. فكرتها إنك تقسم الموقع لقطع صغيرة (Components) وتركبها سوية.
• Next.js: هو إطار عمل مبني على React. هذا الستاندرد الحالي لأغلب الشركات لأنه ينطيك سرعة، وأداء عالي، و SEO قوي (يخلي موقعك يطلع ببحث كوكل).

أدوات لازم تعرفها

كمطور واجهات، الكود وحده مو كافي. أكو أدوات يومية راح تستخدمها:

• VS Code: المحرر اللي تكتب بيه الكود.
• Git & GitHub: حتى تحفظ نسخ من كودك وتشارك شغلك ويه الفريق.
• Browser Developer Tools: أدوات بداخل كروم تساعدك تكتشف الأخطاء وتعدل التصميم مباشرة.

منين أبدي؟

الطريق واضح وما يحتاج تدوخ نفسك بالمصادر:

1. تعلم HTML واعرف كل Tags المهمات فقط.
2. تعلم CSS وافهم الـ Flexbox و الـ Grid (أهم شي).
3. تعلم JavaScript وافهم الأساسيات والـ DOM Manipulation.
4. سوي مشاريع بسيطة (موقع شخصي، آلة حاسبة، قائمة مهام).
5. بعدين، وفقط بعدين، انتقل لتعلم React و Next.js.

لأن أني مبرمج وردة مال الله فراح أسوي بيج لكل تقنية تحتاج تعرفه و بالتسلسل ان شاء الله, أحنا ما نريد نبني موقع كورسات أحنا جاي نبني موقع علمود المبرمج يعرف من وين يبدي و يا مصادر يستخدم حتى يتعلم. فالي اريده منك هسة شوف هاي الصفحات بالتسلسل

1- بيج خاص لhtml

2- بيج خاص لcss

3- بيج خاص لjavascript

أذا تريد تعرف عن الباكند أيضا تكدر تشوف هذا الصفحة.