دليل "التحويل الآمن": شلون تنقل من ويندوز إلى لينكس بدون مشاكل؟ 🐧💻
قررت تترك "ويندوز" وتجرب حرية "لينكس"؟ عاشت إيدك، هاي خطوة ممتازة! بس حتى لا تضيع ملفاتك أو تنصدم بالواقع وتكول "شسويت بنفسي"، لازم تمشي بخطوات مدروسة ومضمونة.
1. لا تستعجل وتفرمت "ويندوز" فوراً! 🛑
قبل ما تحذف ويندوز، جرب تعيش أجواء لينكس وأنت بعدك بمكانك.
- استخدم برامج مفتوحة المصدر: ابدأ استبدل برامجك المعتادة ببدائل لينكس. مثلاً بدل Chrome استخدم Firefox، وبدل MS Office جرب LibreOffice.
- جرب النظام بـ "فلاشة" (Live USB): لا تنصب شي! حط لينكس على فلاشة وشغله من البوت (Boot). تفقد الواي فاي، الصوت، والكاميرا.. إذا كله تمام، يعني جهازك جاهز.
2. اختار "التوزيعة" اللي تريح بالك 🛠️
لينكس مو نظام واحد، هو "توزيعات" (Distros). لا تروح للأشياء الصعبة بالبداية، ابدأ بالسهل:
- Linux Mint: هذا "ابن عم" ويندوز، الواجهة مالته مألوفة جداً وما راح تحس بفرق چبير بالاستخدام.
- Ubuntu: أشهر توزيعة بالعالم، أي مشكلة تواجهك راح تلكى آلاف الحلول بـ "غوغل".
- Zorin OS: إذا تحب الترتيب والشكل الأنيق اللي يشبه ويندوز 11.
3. النسخ الاحتياطي (الباك أب) هو "الأمان" 🛡️
أهم خطوة بكل العملية! لا تسوي أي شي قبل ما تنقل صورك، فيديواتك، وشغلك المهم على هارد خارجي أو سحابة (Google Drive).
تذكر: أثناء التنصيب، غلطة وحدة ممكن تمسح كل الهارد. خليك بالسليم وسوي باك أب.
4. خيار الـ "Dual Boot" (نظامين بجهاز واحد) 🌓
إذا شغلك يعتمد على برامج معينة موجودة بس بويندوز (مثل Adobe أو ألعاب معينة)، لا تحذف ويندوز. نصب لينكس "بجانب" ويندوز. بهاي الحالة، أول ما تشغل الحاسبة راح يسألك: "تريد تفتح ويندوز لو لينكس؟". هيج تضرب عصفورين بحجر.
5. البرامج والتعريفات 📦
انسى شي اسمه .exe بلينكس. البرامج هنا تنزلها من "متجر البرامج" (Software Store) بضغطة وحدة، أو عن طريق "الترمينال" (Terminal) إذا تريد تصير محترف.
- الألعاب: حالياً منصة Steam وخدمة Proton خلت أغلب ألعاب ويندوز تشتغل بلينكس بامتياز.
جدول البدائل السريع:
| برنامج ويندوز | البديل في لينكس | الملاحظة |
|---|---|---|
| Microsoft Office | LibreOffice | مجاني تماماً ويفتح ملفات وورد |
| Adobe Photoshop | GIMP | قوي جداً بس يحتاج تتعلمه |
| Internet Download Manager | XDM | سريع جداً ومجاني |
| VLC Player | VLC | موجود نفسه بلينكس وبنفس القوة |
هسه خل ننتقل للجانب العملي للانتقال
اولا نفس ماكلت تكدر تجرب لينكس ك live بدل ما تنتقل وتخليه كنظام وحد الى جانب وندوز
نفترض عجبك لينكس وحبيت تنتقل شوف اكو طريقتين للانتقال اختار الي يعجبك بس الطريقه الاولى انسب الك اذا جان شغلك كله بوندوز حاليا
تنصيب لينكس الى جانب وندوز (الطريقه الاولى)
- اول شغلة تحتاج تقسم الهارد مالتك وتخلي مساحة لنظام لينكس هاي الحجي انته مختار توزيعتك الي راح تنصبها
نفس ما تلاحظون هاي الصورة هي داخل وندوز لادارة الاقراص عندك Disk0 هوه قرص النظام الاساسي الي بهاي الحالة الوندوز مجرد تظغط على المساحة الوسطية وتقسم الهارد موجودة كلمة Shrink وتختار المساحة الي راح تنطيها لنظام لينكس
من تقسم الهارد راح تطلعلك مساحة بلون رصاصي لتلعب بعد هنا هاي الشي يحتاجة لينكس حته يشتغل
- وره ما قسمت الهارد تنصب التوزيعه الي تريدها كملف iso حته تكدر تخليها بفلاش
- جيب فلاش مساحتة اكبر من 16 كيكا حته تتفادى مشاكل اذا جانت التوزيعه جبيرة
- راح تحتاج برنامج حته تحرك لينكس داخل الفلاش
امثلة عن هاي البرامج المشهورة
- Rufus (Windows)
- BalenaEtcher (Cross-platform)
- Ventoy (Cross-platform)
ملاحظة كلمة Cross-platform معناها يشتغل على جميع الانظمة لينكس ماك وندوز انصحك كبداية نزل (Rufus)
- اول شغلة الي هيه Device rufus هنا راح يتعرف اذا جان اكو فلاش او لا اذا ماطلع اضغط على المربع وتشوف الفلاش عكس هلشي ف اكو مشكلة بالتعرف على الفلاش اساسا
- المستطيل الثاني تختار عن طريقه ملف الiso الخاص بتوزيعتك الي نزلتها تظغط وتختارة
- انصحك بقيه الاعدادات بقيها افتراضيه ماعدا الخيار الثالث مراح يطلع اذا جنت مختار لينكس للتنصيب
- اظفط start وانتظر لحدما يكمل النسخ على الفلاش
ملاحظة الفلاش لازم فارغ او حتى لو بي ملفات المفروض متحتاجهن لان راح يمسح كلشي
ورة ميكمل النسخ هنا خلصت تقريبا
تعطيل حماية البوت
- تدخل على البايوس الخاص بحاسبتك وتعطل خيار اسمه Secure Boot راح تلكه بالاعدادات العامة او خيارات الBoot
مجرد اذا جان Enabled خلي Disabled احفظ واطلع
خطوات التشغيل
-
خلي الفلاش بالحاسبة وسوي اعادة تشغيل الها
-
ادخل لل بوت اوبشن حسب حاسبك F11 F9 او F2 حسب نوع الحاسبة
-
راح يطلعلك خيارات البوت منين تريد تبوت حاسبتك اختار الفلاش ع اللاغلب راح يصير اسم الفلاش بنفس اسم التوزيعه
-
وره متختارة انته هنا ماسويت شي لتخاف مجرد شغلت لينكس ك live (بعدك ممنصبه اساسا)
-
هنا فتح الك لينكس المفروض اذا اكو مشكلة ف هي غالبا من الملف او طريقه تنصيب خاطئة
شسوي هسه؟
شوف هذا يعتمد عليك تريد تنصبه الى جانب لينكس؟ او فقط تجربه الافضل انو تجربة تشوف كلشي شغال طبيعي او اكو مشكلة بدرايفر معين الخ.